काग

विहान-
कुमाइ बाजेको घरको धूरीमा कराउँछ काग
'अमेरिका ! अमेरिका !!'
खुशी छ बाजे-छोरीज्वाइँले पाएका छन् अमेरिकामा ग्रीनकार्ड

दिउँसो-
कार्की नी भाउजुको थारो भैँसीको घाम ताप्नेमा बसेर
कराउँछ काग- 'प्रजातन्त्र ! प्रजातन्त्र !!'
यसपालि पनि भर्ना नहुने भो भैँसी
भाउजु दुखित छन्

बेलुकी-
सुब्बासाब्को किपट टाँकीको रुखमा
कुस्ती खेलिरहेछ चिबेचरासँग
रकेट झैँ कान्लामाथि कान्लामुनि उडिउडी
कराइरहेछ–'आतङ्कवाद ! आतङ्कवाद !!'

जे होस् कागले आफ्नो नाम काडिरहेछ...